ໃນຕອນບ່າຍຂອງວັນທີ 16 ກໍລະກົດ 2026 ນີ້, ໜ່ວຍຮາກຖານສະຫະພັນແມ່ຍິງ ສະພາປະຊາຊົນແຂວງ (ສພຂ) ໄດ້ຈັດຕັ້ງກອງປະຊຸມເຜີຍແຜ່, ເຊື່ອມຊຶມນິຕິກຳກ່ຽວກັບສະມາ ຊິກສະພາປະຊາຊົນ (ສສ) ເພດຍິງ ແລະ ເອກະສານວັນສຳຄັນຕ່າງໆຂອງຊາດ, ຂອງພັກ ຂຶ້ນຢ່າງເປັນທາງການ.

ກອງປະຊຸມຄັ້ງນີ້ ໃຫ້ກຽດເຂົ້າຮ່ວມ ແລະ ເປັນປະທານໂດຍ ສະຫາຍ ນາງ ວັນນາ ພົມວິສອນ ກຳມະການຄະນະປະຈຳ ສພຂ, ຮອງເລຂາໜ່ວຍພັກ ສພຂ, ທັງເປັນປະທານຄະນະກຳມະການວັດທະນະທຳ-ສັງຄົມ ແລະ ຊົນເຜົ່າ ສພຂ; ມີບັນດາສະຫາຍ ສະມາຊິກສະຫະພັນແມ່ຍິງ ພາຍໃນສະພາປະຊາຊົນແຂວງ ເຂົ້າຮ່ວມຢ່າງພ້ອມພຽງ.

ການຈັດກອງປະຊຸມເຊື່ອມຊຶມໃນຄັ້ງນີ້ ມີຈຸດປະສົງເພື່ອແນໃສ່ຍົກສູງຄວາມຮັບຮູ້ ແລະ ຄວາມເຂົ້າໃຈ ໃຫ້ແກ່ສະມາ ຊິກສະຫະພັນແມ່ຍິງ ກໍຄືພະນັກງານ-ລັດຖະກອນ ຕໍ່ກັບບົດບາດ, ໜ້າທີ່ ທີ່ພົວພັນເຖິງການຊຸກຍູ້, ສົ່ງເສີມບົດບາດຍິງ-ຊາຍ ເວົ້າລວມ, ເວົ້າສະເພາະແມ່ນການສະໜັບສະໜູນ ແລະ ພັດທະນາຂີດຄວາມສາມາດຂອງ ສະມາຊິກສະພາປະຊາຊົນ (ສສ) ເພດຍິງ ໃຫ້ມີຄວາມເຂັ້ມແຂງ ແລະ ສາມາດປະຕິບັດໜ້າທີ່ການເມືອງຂອງຕົນຢ່າງມີປະສິດທິຜົນ ພ້ອມດຽວກັນນັ້ນ, ຜູ້ເຂົ້າຮ່ວມຍັງໄດ້ຮັບຟັງການເຜີຍແຜ່ເອກະສານມູນເຊື້ອວັນສຳຄັນຕ່າງໆ ຂອງພັກ ແລະ ຂອງຊາດ ເພື່ອສ້າງຄວາມສາມັກຄີຮັກຊາດ, ຄຸນສົມບັດສິນທຳປະຕິວັດ ແລະ ຄວາມຮັບຜິດຊອບຕໍ່ໜ້າທີ່ວຽກງານທີ່ໄດ້ຮັບມອບໝາຍ.

ໃນໂອກາດນີ້, ສະຫາຍ ນາງ ວັນນາ ພົມວິສອນ ກໍໄດ້ມີຄຳເຫັນໂອ້ລົມ ແລະ ເນັ້ນໜັກໃຫ້ສະມາຊິກສະຫະພັນແມ່ຍິງທຸກສະຫາຍ ຈົ່ງພ້ອມກັນເອົາໃຈໃສ່ຄົ້ນຄວ້າ, ກຳແໜ້ນເນື້ອໃນຈິດໃຈຂອງນິຕິກຳ ຢ່າງເລິກເຊິ່ງ ແລະ ນຳໄປຈັດຕັ້ງຜັນຂະ ຫຍາຍເຂົ້າໃນການປະຕິບັດວຽກງານຕົວຈິງ ໃຫ້ເກີດດອກອອກຜົນ, ເພື່ອສ້າງຂະບວນການຂອງໜ່ວຍຮາກຖານສະຫະພັນ ແມ່ຍິງ ສະພາປະຊາຊົນແຂວງ ໃຫ້ມີຄວາມຟົດຟື້ນ ແລະ ເຂັ້ມ ແຂງຮອບດ້ານໃນຕໍ່ໜ້າ.

#ພາບ-ຂ່າວ: ສພຂ ໄຊຍະບູລີ.